வாக்காளர் இடாப்பை அச்சிடுவதற்குப் பதிலாக 14,000 கிராம சேவைப் பிரிவுகளை உள்ளடக்கிய டிஜிட்டல் முறையில் பதிவு செய்வதற்கான விரிவான திட்டம் தொடங்கப்பட்டுள்ளதாக தேர்தல் ஆணையாளர் ஜெனரல் சமன் ஸ்ரீ ரத்நாயக்க தெரிவித்தார்.
கண்டி மாவட்ட செயலகத்தில் இன்று (29) நடைபெற்ற நிகழ்ச்சியுடன் தொடர்பாக ஊடகங்களுக்கு கருத்து தெரிவிக்கும் போதே அவர் இத்தகவலை வழங்கினார்.
இந்த திட்டத்தில், கிராம அலுவலர்களுக்கு டிஜிட்டல் வாக்காளர் பதிவேட்டின் பொருளை விளக்கவும், 42 கிராம அலுவலர்களுக்கு பாராட்டுச் சான்றிதழ்களை வழங்கவும் முயற்சி செய்யப்பட்டது.
தேர்தலுக்கான புதிய முறையில், காகிதத்தில் தரவுகளைப் பதிவு செய்வதற்கு பதிலாக, ஒன்லைன் தொழில்நுட்பத்தைப் பயன்படுத்தி டிஜிட்டல் வாக்காளர் பதிவேடு உருவாக்கப்படும் என அவர் குறிப்பிட்டார்.
இது வரவிருக்கும் 2024ஆம் ஆண்டு தேர்தலில் பயன்படுத்தப்படும் வாக்காளர் பதிவேட்டின் அடிப்படையில் நடைபெறும் என்றும், இந்த ஆண்டின் ஜனவரி 1ஆம் திகதிக்குள் 18 வயதை அடையும் இளைஞர்களும் புதிய பதிவேட்டில் சேர்க்கப்படுவார்கள் என்றும் அவர் தெரிவித்தார்.
மேலும், எதிர்வரும் உள்ளூராட்சித் தேர்தலில் பயன்படுத்தப்படும் வேட்புமனுவை, நீதிமன்ற உத்தரவுகள் மற்றும் பாராளுமன்ற முடிவுகளின்படி அறிவிக்கப்படும் என்றும், அந்த முடிவின் அடிப்படையில் புதிய வேட்புமனுவைப் பயன்படுத்துவதற்கான முடிவு எடுக்கப்படும் என்றும் தேர்தல் ஆணையாளர் தெரிவித்துள்ளார்.
